Məlum olduğu kimi, 10 günə yaxındır Bakının bir çox ərazilərində içməli suyun verilməsində ciddi problemlər yaşanır.

Xüsusən də Yasamal rayonunda, Suraxanı rayon Yeni Günəşli, Qaraçuxur qəsəbələrində, eləcə də şəhərin digər bir çox hissələrində əhaliyə su ya böyük fasilələrlə verilir, ya da ümumiyyətlə verilmir.

Mövzuyla bağlı iqtisadçı Natiq Cəfərli öz sosial şəbəkə səhifəsində paylaşım edib və bu sahəyə cavabdeh olan şəxslərdən cavab istəyib: “2018-ci ilin aprel ayında, Nazirlər Kabinetinin iclasında dedilər ki, Bakı şəhərinin 80%-i sutkada 24 saat su ilə təmin edilib, yaxın 2-3 ildə bu rəqəm 100% olacaq…

2025-ci il, iyul ayı. Bu bəyanatdan 7 il keçib, mətbuatda və sosial şəbəkələrdə yayılan məlumatlara görə, Bakının bəzi rayonlarında və ətraf qəsəbələrdə günlərlə su gəlmir, ən yaxşı halda sutkada 2 saat su təminatı olur.

O zamankı adı ilə “Azərsu”-ya tapşırıq verilmişdi ki, Bakının su təminatı 100%-ə çatsın, onlar da gedib özlərinə 250 milyon manata yeni bina tikdilər. Özü də, binaya heç köçə də bilmirlər, yəqin binada su gəlmir, yoxsa köçərdilər.

Tapşırıqları, qərarları yerinə yetirməyən məmurlar niyə cəza almırlar? İndi Bakıda 38-39 dərəcə isti olur, bu istidə camaat susuz nə etsin bəs?!”