Efir qadağası qoyulan müğənnilərdən şok addım: Məmurların, iş adamlarının qapısına gedib...

04 Aprel 2026

2149

Efir qadağası qoyulan müğənnilər məmurların və iş adamlarının qapısına xahiş-minnətə düşüb.

Bir neçə aydır bəzi müğənnilərə qoyulan efir qadağası cəmiyyət tərəfindən təqdirəlayiq addım kimi qiymətləndirilir. Demək olar ki, ictimaiyyət bu qərarı alqışlayır. Çünki bu addım uzun müddətdir formalaşan ictimai tələbin nəticəsi idi. Tamaşaçılar artıq onların bayağı söhbətlərindən, ailə qalmaqallarından və qeyri-etik davranışlarından bezmişdi.

“Real Azərbaycan”ın əldə etdiyi məlumata görə, bu qərardan sonra bəzi müğənnilərin, loru dildə desək, əsas gəlir mənbələri bağlanıb. Səsi, sənəti və mədəniyyəti ilə deyil, daha çox qalmaqal və süni gündəmlə tanınan bu “dırnaq arası sənət adamları” çıxılmaz vəziyyətə düşüblər. Artıq onların qeyri-rəsmi yollarla qazandıqları vəsait belə vəziyyətdən çıxmağa kifayət etmir.

Məlumata görə, bəziləri üzərlərində olan qadağanın götürülməsi üçün müxtəlif vasitələrə əl atır, hətta vəzifəli və imkanlı şəxslərin qapısını döyməyə çalışırlar. Buna baxmayaraq, verilən qərar hələ də qüvvədə qalır və dəyişməz olaraq tətbiq edilir.

Aidiyyəti qurumların nümayəndələrinin isə bu tip müraciətlərdən yorulduğu bildirilir.

Qeyd olunur ki, bu proses efir məkanında müəyyən təmizlənmə və keyfiyyətə doğru yönəlmə kimi də dəyərləndirilir. Tamaşaçılar artıq daha səviyyəli, etik normalara uyğun və peşəkar yanaşmanın üstünlük təşkil etdiyi proqramlara üstünlük verməyə başlayıb.

Nəticə olaraq, efir qadağası yalnız ayrı-ayrı şəxslərə qarşı tətbiq edilən məhdudiyyət deyil, bütövlükdə şou-biznes mühitinə verilmiş ciddi mesaj kimi qəbul olunur. Görünən odur ki, tamaşaçı zövqü dəyişir və bu dəyişikliklər gələcəkdə efir məkanının daha sağlam və keyfiyyətli formalaşmasına təsir edəcək.