AYNA sərnişin təhlükəsizliyi və etik davranış qaydalarının pozulması ilə bağlı daxil olan müraciət əsasında araşdırma aparıb. Araşdırmanın nəticəsinə görə, qadın sərnişinə gediş zamanı və səfər başa çatdıqdan sonra tanışlıq təklif edərək onu narahat edən taksi sürücüsü sərnişin daşımadan kənarlaşdırılıb (blok olunub).
Rəsmi məlumata əsasən, sürücünün fəaliyyəti dərhal dayandırılıb, avtomobil xəttdən kənarlaşdırılıb, həmçinin nəqliyyat vasitəsinin sahibkarı izahat üçün idarəyə çağırılıb. Məsələ ilə bağlı qanunvericiliyin tələblərinə uyğun olaraq müvafiq tədbirlərin görüləcəyi bildirilib.
Qeyd edək ki, AYNA bu cür hallara operativ reaksiya verməsi, sərnişinlərin təhlükəsizliyini və hüquqlarını prioritet hesab etməsi ilə seçilir. Agentlik tərəfindən tətbiq olunan nəzarət mexanizmləri və sərt tədbirlər taksi xidmətlərində intizamın gücləndirilməsinə, etik davranış qaydalarına əməl olunmasına və ictimai etimadın qorunmasına xidmət edir.
Ümid edirik ki, görülən tədbirlər sərnişinlərin hüquqlarının qorunmasına və xidmət keyfiyyətinin yüksəldilməsinə töhfə verəcək.