"İnsan bəzən istəmədən güclü olmağa məcbur qalır. Bu həyat sınaqlarla doludur".

Bu sözləri tanınmış müğənni Aysun İsmayılova anası Rəqsanə İsmayılovanın həbsinə münasibət bildirərkən deyib.

O, bildirib ki, Allah səbr edənləri sevir və səbr etmək lazımdır:

"Bizim o sınaqları keçmək üçün mütləq ki, bir səbəbimiz var. Nə qədər də ağır, çətin olsa da dözməyə məcbur buraxılırıq. Bu da keçəcək, bir gün xoşbəxtlik gələcək. Allah hər kəsin qəlbinə görə versin. Günahsız insanı şərləyib, günahlandırmaq Allah tərəfindən bağışlanmazdır. Allah səbr edənləri sevir, sadəcə səbr etmək lazımdır. Çünki səbr edənlər sonda mükafatlanır".

Qeyd edək ki, Sabunçu rayonunda polis əməkdaşlarının vətəndaşlardan daxil olan şikayətlər əsasında həyata keçirdikləri tədbirlər nəticəsində dələduzluq etməkdə təqsirli bilinən 1979-cu il təvəllüdlü İsmayılova Rəqsanə İsmayıl qızı saxlanılıb. Araşdırmalarla müəyyən edilib ki, o, iki nəfər zərərçəkən şəxsin ümumilikdə 35.000 manat dəyərində qızıl-zinət əşyalarını və 520.000 ABŞ dolları məbləğində pulunu dələduzluqla ələ keçirib. Onun barəsində məhkəmənin qərarı ilə 4 ay müddətində həbs qətimkan tədbiri seçilib. / Azxeber.com